შენახვა


გადაგზავნა

დაკომენტარება

ზაქარია ფალიაშვილის მემორიალური სახლ-მუზეუმის შენობას უძრავი ძეგლის სტატუსი მიენიჭება

კულტურა
წყარო:  New Press / http://newpress.ge/ 
 05 მარტი 2019

ქალაქ ქუთაისში არსებული, კომპოზიტორ ზაქარია ფალიაშვილის მემორიალური სახლ-მუზეუმის ისტორიულ შენობას, ეროვნული კატეგორიის უძრავი ძეგლის სტატუსის მისანიჭებლად წარადგენენ. სათანადო დოკუმენტაციას საქართველოს კულტურული მემკვიდრეობის სააგენტო უკვე ამზადებს.

 საფუძვლიანი რესტავრაციის შემდეგ, ზაქარია ფალიაშვილის მუსიკალური საკრავები კვლავ დიდი კომპოზიტორის ქუთაისის მემორიალურ სახლ-მუზეუმს დაუბრუნდა. ქართული კლასიკური მუსიკის ფუძემდებლის მიერ ნაქონი ინსტრუმენტები – ფიზჰარმონია და პიანო დე მელოდიკა ისევ სამუზეუმო ექსპონატებად გამოიფინება.

 მუსიკალური საკრავების რესტავრაცია ქუთაისის კულტურულ-სახელოვნებო და საგანმანათლებლო დაწესებულებათა გაერთიანებასთან შარშან, გაფორმებული მემორანდუმის საფუძველზე კულტურული მემკვიდრეობის დაცვის ეროვნულმა სააგენტომ უზრუნველყო. ქუთაისიდან თბილისში დადგენილი წესით ტრანსპორტირების შემდეგ, სამუზეუმო ექსპონატების აღდგენა განახორციელა რესტავრატორმა გიორგი შიოშვილმა, რომელიც საქართველოში ძველი სამუსიკო საკრავების ერთ-ერთი გამორჩეული რესტავრატორია.

 როგორც კულტურული მემკვიდრეობის სააგენტოში აცხადებენ, აქტიურ ფაზაშია ქალაქ ქუთაისის ზაქარია ფალიაშვილის მემორიალური სახლ-მუზეუმის მუზეუმოგრაფიის კონცეფციის შემუშავების პროცესიც, რომელსაც კულტურული მემკვიდრეობის დაცვის ეროვნული სააგენტოს გენერალური დირექტორის ინიციატივითა და ორგანიზებით, ფრედერიკ შოპენის ვარშავის სახლ-მუზეუმის სპეციალისტები ამზადებენ. 

​მათივე ინფორმაციით, კონცეფციამ სამუზეუმო სივრცის საკონცერტო, საგამოფენო და სხვა ტიპის კულტურული ღონისძიებების გარემოდ ქცევა უნდა უზრუნველყოს, რაც თავის მხრივ ქუთაისში კლასიკური მუსიკის წარმოჩენასა და პოპულარიზაციას შეუწყობს ხელს. ამავე დოკუმენტის საფუძველზე სააგენტოს მიერ მომზადდება სახლ-მუზეუმის სარეაბილიტაციო პროექტიც. სააგენტოს ორგანიზებითვე, ახლო მომავალში ფალიშვილის ქუთაისის სახლ-მუზეუმსა და შოპენის ვარშავის სახლ-მუზეუმს შორის თანამშრომლობის ხელშეკრულება გაფორმდება, რაც სამომავლოდ ქართველი კომპოზიტორის სახლ-მუზეუმის მოდერნიზაციის პროცესს მნიშვნელოვნად განაპირობებს. 

ფალიაშვილის მემორიალური სახლ-მუზეუმის სამომავლო განვითარებისთვის ადგილობრივ და საერთაშორისო დონეზე ხელშეწყობის უზრუნველყოფის ვალდებულება კულტურული მემკვიდრეობის დაცვის ეროვნულ სააგენტოს უკვე 1 წელია ნებაყოფლობით აქვს აღებული.

 ქუთაისში ზაქარია ფალიაშვილის მუზეუმი საერთაშორისო დონეზე მოეწყობა

სტატიაში გამოქვეყნებულ მასალაზე პასუხისმგებელია ავტორი გამოცემა
ინფორმაციის გავრცელებას უზრუნველყოფს სააგენტო REGIONS.GE
დასაკომენტარებლად გთხოვთ გაიაროთ ავტორიზაცია/რეგისტრაცია