შენახვა


გადაგზავნა

დაკომენტარება

ეროვნული ჯილდოს მფლობელი პედაგოგი სკოლებში სქესობრივ განათლებაზე

განათლება
წყარო:  http://batumelebi.netgazeti.ge / ბათუმელები 
 01 აპრილი 2019
მასწავლებლის ეროვნული ჯილდოს მფლობელი, ინგლისური ენის მასწავლებელი მანანა კაპეტივაძე, პარლამენტის ადამიანის უფლებათა კომიტეტის მიერ ბავშვთა კოდექსში გაკეთებულ ჩანაწერთან დაკავშირებით, კომენტარს „ბათუმელებთან“ აკეთებს. ჩანაწერის მიხედვით, რომელიც პარლამენტში კენჭისყრაზე ჯერ არ გაუტანიათ, სკოლებში მოზარდის სქესობრივი განათლება დასაშვებია მხოლოდ და მხოლოდ მშობლის თანხმობით. ბავშვის უფლებადამცველი არასამთავრობო ორგანიზაციები ამ ფორმულირებაში პრობლემას ხედავენ. მათი აზრით, მსგავსი ჩანაწერები წინააღმდეგობაში მოდის ბავშვთა უფლებებთან. „მე მგონი, რაღაც დოზით, დელიკატურად უნდა იყოს სქესობრივი აღზრდის საკითხები შეტანილი სკოლაში, რადგან ბავშვები დამოუკიდებლად რა ინფორმაციასაც პოულობენ, ამას ყურადღება არ ექცევა, მათ შორის, არც ოჯახში. ის, რომ ყველა წყარო სანდო არ არის, ამის შესახებ ბავშვებმა არ იციან. არ იციან ინფორმაციის გაფილტვრა, ამიტომ ჩვენ, მასწავლებლებმა, უნდა ვასწავლოთ, რაც მათთვის არის საჭირო და მნიშვნელოვანი. თუ ჩვენ გვინდა, რომ სკოლა იყოს თანამედროვე და ბავშვებმა მიიღონ განათლება, მშობელიც უნდა იყოს ჩართული ამ პროცესში. ტრენინგებს ვატარებთ, რომ მშობლები იყვნენ აქტიურები, შეიძლება მშობელიც იყოს ასეთი გაკვეთილების თანამონაწილე, მაგრამ, ვფიქრობ, მნიშვნელოვანია ამ საკითხში მშობლების ცნობიერების ამაღლებაც – მათაც რომ ესმოდეთ ასეთი თემების მნიშვნელობა. მშობლებმა უნდა გაიგონ რაზეა საუბარი. თუმცა ჯერ უნდა შევჯერდეთ იმაზე, რა უნდა ისწავლებოდეს სკოლაში. მასწავლებელია, ტრენერია თუ სახელმწიფო, ყველამ ერთად უნდა გადაწყვიტოს, რა უნდა ვასწავლოთ. როცა მივაღწევთ კონსენსუსს, შემდეგ შეგვიძლია ვასწავლოთ ბავშვებს“. მანანა კაპეტივაძის თქმით, როცა კანონმდებლობის დონეზე მსგავსი ჩანაწერი კეთდება, მნიშვნელოვანია, მანამდე გაიმართოს უფრო ფართო მსჯელობა და შემდეგ მიიღონ საკანონმდებლო ცვლილება: „ვფიქრობ, პირველ ეტაპზე შესაძლებელი იყო პილოტირებაც, რომ დაკანონების შემდეგ ისევ არ გაჩნდეს გარკვეული პრობლემები“. რაც შეეხება მსგავსი თემების სწავლებაში სასულიერო პირების ჩართულობას, მანანა კაპეტივაძე ამბობს, რომ ეს მხოლოდ იმ შემთხვევაში იქნება მისაღები, თუკი სასულიერო პირი მშობელია. „არა მგონია, რომ საჯარო სკოლებში სასულიერო პირები უნდა იყვნენ აქტიურად ჩართული, თუკი სასულიერო პირი არ არის ერთ-ერთი მშობელი. მათი ჩართვა შეიძლება, თუ არის სასულიერო სასწავლებელი.“ „ბათუმელების“ კითხვაზე, უნდა იყოს თუ არა სკოლა უფრო აქტიურად ჩართული განხილვებში, როცა საკითხი ბავშვების, მოზარდების განათლების უფლებებს ეხება? – მანანა კაპეტივაძე ამბობს, რომ – კი. ბავშვთა კოდექსის დაგეგმილ ცვლილებაზე არც პარლამენტის განათლებისა და მეცნიერების კომიტეტს უმსჯელია.
სტატიაში გამოქვეყნებულ მასალაზე პასუხისმგებელია ავტორი გამოცემა
ინფორმაციის გავრცელებას უზრუნველყოფს სააგენტო REGIONS.GE
დასაკომენტარებლად გთხოვთ გაიაროთ ავტორიზაცია/რეგისტრაცია
განათლება