შენახვა


გადაგზავნა

დაკომენტარება

"ჩვენ არასდროს დავნებდებით"-რა გეგმები აქვთ "სირცხვილიას" ორგანიზატორებს

პოლიტიკა
წყარო:  გურიის მოამბე / http://guriismoambe.com/ 
ორიგინალი სტატია:  http://guriismoambe.com/?m=68&news_id=41422 
 20 სექტემბერი 2019

(ტაბულა) პარლამენტთან მიმდინარე აქციაზე "ერთად ერთის წინააღმდეგ" სირცხვილიას ორგანიზატორებმა საზოგადოებას მანიფესტი წაუკითხეს და მათი სამომავლოს გეგმები გააცნეს.

გთავაზობთ მანიფესტს სრულად:

"ჩვენ ვართ თავისუფალი საქართველოს თავისუფალი მოქალაქეები - ექიმები, რომლებსაც ანდობთ ჯანმრთელობას, იურისტები, რომლებსაც ანდობთ სიმართლეს, ჟურნალისტები, რომლებსაც ანდობთ სათქმელს, პოლიციელები, რომლებსაც ანდობთ უსაფრთხოებას, მასწავლებლები, რომლებსაც ანდობთ შვილებს, ხელოვანები და მეცნიერები, სტუდენტები და პენსიონერები, სპორტსმენები და მაღაროელები, ყველა ის, ვისი სამართლიანი, მშვიდობიანი პროტესტიც უკვე 3 თვეა გრძელდება და როდესაც ჩვენ ყველანი ერთად ვდგავართ ქვეყნის სამსახურში, ჩვენ ვცვლით ქვეყანას უკეთესობისკენ.

განსხვავებულთა ერთობა იყო, რამაც მოგვიტანა თავისუფლება, რამაც მოგვიტანა დამოუკიდებლობა და რამდენიმე კვირის წინ ამანვე მოგვიტანა სამოქალაქო საზოგადოების უდიდესი გამარჯვება - პროპორციული არჩევნები, რადგან როდესაც ერთად ვდგებით აღარ არსებობს წინაღობა, რომელსაც ჩვენ ვერ გადავლახავათ, აღარ არსებობს ძალა, რომელსაც ჩვენ ვერ ვერევით და აღარ არსებობს იარაღი, რომელიც აფერხებს ჩვენს უკომპრომისო და უკან მოუხედავ სწრაფვას თავისუფლებისკენ.

20 ივნისს ჩვენ ხელისუფლების მიერ ჩადენილმა სამარცხვინო დანაშაულმა განსხვავებულები გაგვაერთიანა, მაგრამ ხელისფულებამ სამშობლოს ერთგული ხალხის პროტესტს ძალადობით უპასუხა. დაშავდა ასეულობით მშვიდობიანი დემონსტრანტი, მათ შორის მედიის 40-მდე წარმომადგენელი და რაც ყველაზე ტრაგიკულია, მოქალაქეთა ჯანმრთელობას მიადგა აუნაზღაურებელი ზიანი. ჩვენ ამას არ ვპატიობთ!

დღეს აქ შევიკრიბეთ იმისთვის, რომ ვუთხრათ ბიძინა ივანიშვილს: თქვენ გქონდათ შანსი, რომ შეგესმინათ საზოგადოების მოთხოვნები და აგეღოთ პასუხისმგებლობა დაშვებულ შეცდომებზე. თუმცა, ამის ნაცვლად, თქვენ ღიად დაუპირისპირდით ხალხის ნებას. თქვენ დააწინაურეთ შინაგან საქმეთა მინისტრი, რომელიც დამნაშავე იყო ხალხის წინაშე და ქვეყნის პირველი პირად გაასაღეთ.

და ჩვენ, არც ამას ვპატიობთ!

ჩვენთვის მიუღებელია ერთპიროვნული, ოლიგარქიული, არაფორმალური მმართველობა. ბიძინა ივანიშვილმა იყიდა და მიიტაცა ყველა სახელისუფლებო შტო, იგი აკონტროლებს საკანონმდებლო, აღმასრულებელ და სასამართლო ხელისუფლებას, რეალობის გასაყალბებლად იყენებს პროპაგანდისტულ მედიას და დევნის თავისუფალ სიტყვას.

დღეს, 2019 წლის 20 სექტემბერს, ჩვენ მისმა უდიდებულესობამ სამოქალაქო საზოგადოებამ ჩავრთეთ წამზომი, რომელიც უკუთვლას 2020 წლის პროპორციულ არჩევნებზე დაასრულებს. 

ჩვენ, მოძრაობა "ქვეყნის სამსახურში", აქ შეკრებილი საზოგადოება და ადამიანები, რომლებიც გვიყურებენ და შორიდან გვიჭერენ მხარს, ვაცხადებთ, რომ ჩვენი მიზანია მშვიდობიანად დავასრულოთ მტერთან კოლაბორაციაში მხილებული ბიძინა ივანიშვილის ერთპიროვნული მმართველოვა.

ჩვენ სამოქალაქო მოძრაობა ვერთიანდებით ცივილიზებული სამყაროს ღირებულებების გარშემო, რაც ნიშნავს დემოკრატიულ, თავისუფალ ქვეყანაში ცხოვრებას, სადაც მთავრობა ანგარიშვალდებულია საზოგადოებასთან, სადაც სასამართლო სისტემა თავისუფალია პოლიტიკური გავლენებისგან, სადაც საკანონმდებლო ორგანო ემსახურება მოქალაქეების ინტერესს.

ჩვენ ვერთიანდებით რუსული ოკუპაციის წინააღმდეგ და მიგვაჩნია, რომ ევროატლანტიკური ინტეგრაცია საქართველოს უალტერნატივო მომავალია. ისევე, როგორც ევროატლანტიკური სივრცისთვის - საქართველო.

ჩვენი უპირველესი ამოცანაა დავიცვათ ჩვენი მოძრაობისა და ქართველი ხალხის ისტორიული მონაპოვარი - პროპორციული არჩევნები!

და საბოლოოდ გამარჯვებისთვის გავაკეთებთ შემდეგს:

1. თბილისსა და რეგიონებში შევქმნით და გავაძლიერებთ აქტივისტთა ჯგუფებს, რომლებიც მოსვენებას არ მისცემენ ივანიშვილის მსახურებს.

2. იურიდიულ მხარდაჭერას გავუწევთ გავრილოვის ღამის დაკავებულებსა და დაზარალებულებს.

3. შევქმნით სწრაფი რეაგირების იურიდიულ ჯგუფს, რომელიც ოპერატიულ კონსულტაციას გაუწევს მოძრაობის წევრებს და ყველა ადამიანს, ვინც რეპრესირებულია სახემწიფოსგან.

4. შევქმნით ახალ მედიაპლატფორმებს, რომელიც დაამარცხებს ბიძინა ივანიშვილის პროპაგანდისტულ მედიას.

5. შევქმნით ელფების არმიას, რომელიც დაამარცხებს ივანიშვილის ტროლებს.

6. ჩვენ ვაწარმოებთ ფართომასშტაბიან კამპანიას იმისთვის, რათა 2020 წელს მოქალაქეთა კრიტიკულმა უმრავლესობამ გააკეთოს ინფორმირებული არჩევანი.

ეს არის ჩვენ გენგეგმა 2020 წლამდე.

ჩვენ დავამარხებთ ივანიშვილს საერთაშორისო არენაზე, ჩვენ დავამარცხებთ ივანიშვილს საქართველოში, ჩვენ დავამარცხებთ რუსეთს საქართველოში, ჩვენ არასდროს დავანებებთ ჩვენ ქვეყანას არც იმ და არც სხვა ერთის ნებას და ჩვენ არასდროს დავნებდებით".

სტატიაში გამოქვეყნებულ მასალაზე პასუხისმგებელია ავტორი გამოცემა
ინფორმაციის გავრცელებას უზრუნველყოფს სააგენტო REGIONS.GE
დასაკომენტარებლად გთხოვთ გაიაროთ ავტორიზაცია/რეგისტრაცია