ბათუმში ელექტრომობილების ქარხანა აშენდება
ბათუმში ელექტრომობილების ქარხანა აშენდება, - ამის შესახებ ბათუმის მერმა ლაშა კომახიძემ "საქმიანი დილის" ეთრში განაცხადა. ეს იქნება ქართულ-ჩინური კომპანია, რომელიც დაკავებული იქნება ელექტრომობილების, კერძოდ ელექტრო ავტობუსებისა და მინიბუსების აწყობით. 

"ორი დღის წინ დავბრუნდით ჩინეთიდან, სადაც მთავრობის თავჯდომარესთან ერთად ოფიციალური ვიზიტით ვიმყოფებოდი, კერძოდ, საქმე ეხებოდა ბათუმში ელექტრო მობილების ქარხნის გახსნას, რაც ფაქტიურად გადაწყვეტილია. საუბარია ქართულ-ჩინურ ერთობლივ კომპანიაზე, რომელიც დაკავებული იქნება ელექტრომობილების აწყობით, კერძოდ ელექტრო ავტობუსებზე და მინიბუსებზეა აქცენტი. ვფიქრობ, რომ ეს ნამდვილად კარგი გადაწყვეტილებაა, რადაგან რეგიონში მსგავსი ტიპის საწარმო არ არის. 

ჩინელი პარტნიორების დარწმუნებისას გადამწყვეტ როლს თამაშობს ქალაქის სტრატეგიული მდებარეობა, რადგან ბათუმში თავმოყრილია კომუნიკაციის ყველა საშუალება - საზღვაო, სარკინიგზო, საჰაერო, ასევე, სიახლოვე ყველა სტრატეგიულ მეზობელთან, - ვფიქრობ, ეს იყო ის გადამწყვეტი ფაქტორები, რითაც ჩინური მხარე დაინტერესდა", - განაცხადა ქალაქ ბათუმის მერმა.
02.04.2018
 
ინფორმაცია მოწოდებულია:
სტატიაში გამოქვეყნებულ მასალაზე პასუხისმგებელია ავტორი გაზეთი.

ინფორმაციის გავრცელებას უზრუნველყოფს სააგენტო REGIONS.GE