შენახვა


გადაგზავნა

დაკომენტარება

გორის სოფელ ქვახვრელის სკვერისთვის 35 000 ლარი გადარიცხეს - ტენდერი კი ხელახლა გამოაცხადეს

ახალი ამბები
წყარო:  შიდა ქართლი / http://qartli.ge/ 
სტატიაში გამოქვეყნებულ მასალაზე პასუხისმგებელია ავტორი გამოცემა
ინფორმაციის გავრცელებას უზრუნველყოფს სააგენტო REGIONS.GE
 04 მაისი 2021
გორის სოფელ ქვახვრელში სკვერის გასაკეთებლად 35 ათასი ლარი დახარჯეს. ობიექტი მერიას 2021 წლის 31 იანვარს უნდა ჩაებარებინა, თუმცა ლენტი არ გაიჭრა. თებერვალში გორის მერის პირველმა მოადგილემ ერასტი ელიჯარაშვილმა კომპანიის დირექტორს მისწერა, რომ გაემიჯნა შესრულებული და შესასრულებელი სამუშაოები და იმის მიხედვით გადაურიცხავდა თანხას. როგორც მერიის ზედამხედველობის სამსახურში დაადგინეს, კომპანიამ სამუშაოების 38% შეასრულა. 35 ათასი ლარი გადაურიცხეს და ხელშეკრულებაც გაუწყვიტეს. ვადის დარღვევის გამო არ დაუჯარიმებიათ. კოტე თავზარაშვილმა კომპანიის შავ სიაში შეყვანა მოითხოვა. კომპანიის დირექტორი იმუქრება, რომ თუ მერია მსგავს ნაბიჯებს გადადგამს, თავადაც შესაბამის ზომებს მიიღებს. რაც შეეხება სკვერს, დღეს აღმოჩნდა, რომ სკვერი ახლიდანაა გასაკეთებული. ამისათვის, 2021 წლის 4 მაისს, გორის მერიამ ახალი ტენდერი გამოაცხადა იმავე რაოდენობის თანხაზე, რაც 2020 წლის ზაფხულში - 94 000 ლარზე. საქმე იმაშია, რომ გორის მუნიციპალიტეტის სოფელ ქვახვრელში სკვერის გაკეთება 2020 წლის ზაფხულში დაიწყო და 6 თვეში, 2021 წლის 31 იანვარს უნდა დამთავრებულიყო, თუმცა 6 თვეა მშენებარე სკვერი მიტოვებულია. კომპანია ,,ამ ჯორჯიას წარმომადგენელმა ალექსანდრე მათეშვილმა მერიის ზედამხედველობის სამსახურის უფროსს, ზვიად ანესაშვილს აცნობა, რომ საპროექტო ნახაზები ერმანეთს აცდენილია. თუმცა, როგორც კომპანიის წარმომადგენელი აცხადებს, რეაგირება არ მოახდინეს და ნახაზების შეცვლის საშუალება არ მისცეს. ,,გამოიკვეთა მთელი რიგი გარემოებები, რამაც ხელი შეუშალა სამუშაოების ნორმალურ მიმდინარეობას, კერძოდ, საპროექტო დოკუმენტაციაში არსებული უზუსტობების გამო, ხარჯთაღრიცხვა რიგ შემთხვევაში სრულად ვერ ასახავდა ობიექტზე არსებულ რეალობას. არ არსებობდა არცერთი მუშა ნახაზი დეკორატიული და საგზაო ბორდიურების, დეკორატიული ფილებისა თუ სხვა ნებისმიერი სამუშაოს შესასრულებლად. არსებული (ერთადერთი) სკვერის გეგმა არ აღმოჩნდა საკმარისი სკვერის მოწყობისათვის აუცილებელი სამუშაოების ჩასატარებლად. არსებულმა გარემოებებმა საგრძნობლად გააძნელა სამუშაო პროცესის წარმართვა. - აღნიშნულია ,,ამ ჯორჯიას საჩივარში. კომპანიის დირექტორი განმარტავს, რომ მან სიტყვიერად აცნობა როგორც გორის მუნიციპალიტეტის მერიის ზედამხედველობის სამსახურს, ასევე საზედამხედველო კომპანია შპს "ოპტიმალ+"-ის ზედამხედველს. ასევე მან არაერთი წერილით მიმართა გორის მუნიციპალიტეტის მერიას. გორის მუნიციპალიტეტის შესაბამისი სამსახურები და საზედამხედველო კომპანია შპს "ოპტიმალ+" დაეთანხმნენ მიმწოდებლის მოსაზრებას, მაგრამ მხოლოდ სიტყვიერად, ოფიციალური პასუხი გორის მუნიციპალიტეტის მერიიდან მიმწოდებელს არ მიუღია. მიმწოდებელი განმარტავს, რომ მას მერიაში წარდგენილი აქვს კორექტირებული გეგმა-გრაფიკი და არაერთი წერილით მოითხოვა სამუშაოების შესრულების ვადის გაგრძელება. ასევე მიმწოდებელს გააგრძელებინეს საბანკო გარანტიების ვადები, იმ მოტივით, რომ გაგრძელდებოდა სამუშაოების დასრულების ვადა და შესაბამისად ხელშეკრულების მოქმედების ვადაც, რაც არ მომხდარა. მიმწოდებელი ასევე განმარტავს, რომ იგი არ ეთანხმება შემსყიდველი ორგანიზაციის მიერ ხელშეკრულების შეწყვეტის გადაწყვეტილებას და აპირებს, რომ მიმართოს კანონმდებლობით გათვალისწინებულ ღონისძიებებს. გორის მერის პირველი მოადგილე ერასტი ელიჯარაშვილი ახსნა-განმარტებაში აღნიშნავს, რომ კომპანიის წარმომადგენელს ზეპირსიტყვიერად არაერთხელ განუმარტა და დამატებით მიაწოდა გარკვეული სახის დოკუმენტები, როგორც ელექტრონულად, ასევე მატერიალურად, როგორც ელექტრონული ტენდერის მსვლელობის პერიოდში, ასევე ხელშეკრულების გაფორმების შემდგომ. ,,საპროექტო სახარჯთაღრიცხვო დოკუმენტაციაში რაიმე სახის უზუსტობასთან დაკავშირებით კომპანიას გორის მუნიციპალიტეტის მერიისთვის არ უცნობებია. ამავდროულად, გორის მუნიციპალიტეტის მერიაში მიმწოდებლის განმარტებას თანდართული 2021 წლის 4 და 21 ოქტომბრის წერილები არც ელექტრონული და არც მატერიალური სახით წარდგენილი არ ყოფილა, მეტიც, აღნიშნული წერილები არის მომავალი თარიღით დათარიღებული, რაც გონივრულ ეჭვს ბადებს წერილების არარსებობაზე და მიმწოდებლის არაკეთილსინდისიერ დამოკიდებულებაზე, როგორც გორის მუნიციპალიტეტის მერიის, ასევე სახელმწიფო შესყიდვების სააგენტოს მიმართ. - წერია გორის მერიის პასუხში.  
დასაკომენტარებლად გთხოვთ გაიაროთ ავტორიზაცია/რეგისტრაცია