შენახვა


გადაგზავნა

დაკომენტარება

გორის მერი და პოლიციის უფროსი ბიუჯეტის ფულით არემონტებენ დამტვრეულ Lexus RX 300-ს

მულტიმედია
წყარო:  შიდა ქართლი / http://qartli.ge/ 
სტატიაში გამოქვეყნებულ მასალაზე პასუხისმგებელია ავტორი გამოცემა
ინფორმაციის გავრცელებას უზრუნველყოფს სააგენტო REGIONS.GE
 07 აპრილი 2021
შიდა ქართლის პოლიციის უფროსი ილია კვაღინაძე Lexus RX 300-ს არემონტებს. ამის თაობაზე შესყიდვების სააგენტოს 5 აპრილს მიმართა. მანამდე, 3 აპრილს, ამავე მარკის ავტომანქანის შესაკეთებლად გორის მერიამ ტენდერი გამოაცხადა, რაზეც 14 000 ლარს ხარჯავს. მერიაც და პოლიციაც ხარჯთაღრიცხვაში მანქანის სახელმწიფოს ნომერს არ უთითებენ. ჩვენ ხელთ გვაქვს ინვოისი, რომელიც პოლიციის უფროსს თეგეტა მოტორსიდან მიაწოდეს. ინვოისის მიხედვით, მანქანას ფარები აქვს შესაცვლელი. პოლიციის უფროსმა შესყიდვების სააგენტოს განუმარტა, რომ სატრანსპორტო საშუალების შეკეთება სასწრაფოა, რადგან ფაქტის წინაშე, მოულოდნელად დადგა. რაც შეეხება გორის მერიის მიერ შედგენილ ხარჯთაღრიცხვას, ამ დოკუმენტის მიხედვით, მანქანას შესაცვლელი აქვს უკანა ბამპერი, გამოსაცვლელი აქვს ამურტიზატორები. დაზიანებულია სამუხრუჭე ხუნდები, საავარიო ბალიშები და ა.შ. დაზიანებულია საწვავის ავზიც, მათ შორის, მერია უთითებს, რომ მანქანა შესაღებია. ცნობისათვის, გორის მერიამ მანქანები თხოვების უფლებით შს სამინისტროს რეგიონულ სამმართველოს რამდენიმე წლის წინ გადასცა. პოლიციის უფროსის მოადგილედ კი მუშაობდა დღევანდელი გუბერნატორი, მამუკა საღარეიშვილი. შიდა ქართლის სამხარეო ადმინისტრაციის პრეს-სამსახურის ცნობით, მანქანებთან გუბერნატორის ადმინისტრაციას კავშირი არა აქვს: ,,იმ დროს, როდესაც მამუკა საღარეიშვილი პოლიციის უფროსის მოადგილედ მუშაობდა, გორის მერიის მხრიდან გადაცემულ მანქანებს შორის, არც ერთი იყო მისი დეპარტამენტს სარგებლობაში. რაც შეეხება დღევანდელ მანქანებს, რაიმე კავშირი ამ მანქანებს შორის, მისთვის ცნობილი არაა - გვითხრეს გუბერნატორის ადმინისტრაციაში. გორის მერიაში აცხადებენ, რომ აღნიშნული მანქანა საკრებულოს თანამდებობის პირებს ემსახურებოდა და მისი ნომერია II371JJ. შს სამინისტროს პრეს-სამსახურმა მანქანის ნომერი არ მოგვაწოდა. ფოტოზე: მარჯვნიდან პოლიციის უფროსი ილია კვაღინიძე, გორის მერი კოტე თავზარაშვილი და გუბერნატორი მამუკა საღარეიშვილი
დასაკომენტარებლად გთხოვთ გაიაროთ ავტორიზაცია/რეგისტრაცია