ხუხაშვილი: თუ ასეთი სისხლისმსმელი იყო სააკაშვილი, მაშინ ივანიშვილი ასობით მილიონ დოლარს რაში უხდიდა?

ამგვარად გამოეხმაურა პოლიტოლოგი გია ხუხაშვილი “ტვ პირველთან” “ქართული ოცნება-დემოკრატიული საქართველოს” თავმჯდომარის ბიძინა ივანიშვილის 1989 წლის 9 აპრილის ტრაგედიასთან დაკავშირებულ წერილს.

“ისტორიის გადაწერის საკმაოდ უხარისხო მცდელობაა ეს წერილი. წყალი იყო, არაფრის მთქმელი იყო ეს წერილი. წინააღმდეგობრივია იმ ნაწილში სადაც ის ლაპარაკობს საზოგადოების გაერთიანებაზე და წარსულის დავიწყებაზე ერთის მხრივ და მეორე მხრივ მთავარი პოლიტიკურ იარაღად ისევ სისხლიანი 9 წელი აქვს მომარჯვებული. იქ სადაც ლაპარაკობს დიქტატორის გამოძახებაზე.

ის ხშირად საუბრობს, რომ ამ დიქტატორს ხშირად აფინანსებდა წლების განმავლობაში და სიამაყით საუბრობს ამაზე და თუ ასეთი დიქტატორი და სისხლისმსმელი იყო სააკაშვილი, მაშინ ასეულობით მილიონობით დოლარს რაში უხდიდა ამ ადამიანს. მას უნდა რომ გვიყვარდეს და ძალიან წუხს იმაზე რომ არ გვიყვარს. თუ უნდა რომ გვიყვარდეს, მაშინ სჯობს ლექსების წერაზე გადავიდეს პირდაპირ. სიყვარულის ბუშტი გასკდა, გაუსკდა. 7 წელი პაემანზე დადიოდა და 7 წლის მერე დარწმუნდა რომ მას უყვარს დამოუკიდებელი საქართველო. კარგი იქნებოდა მარილი რომ მოეყარა ცოტა, თვითკრიტიკული რომ ყოფილიყო. ის არ ცნობს თვითკრიტიკას და ეს ფაქტობრივად აი ამ ყველაფერს ძალიან აუფასურებს.”,-

შეგახსენებთ, პარტია “ქართული ოცნება – დემოკრატიული საქართველოს” თავმჯდომარე ბიძინა ივანიშვილმა 9 აპრილთან დაკავშირებით წერილი გამოაქვეყნა: “ამ დღემ 30 წლის წინ ახალ ეპოქას მისცა დასაბამი”- განაცხადა ივანიშვილმა.