შენახვა


გადაგზავნა

დაკომენტარება

ლანჩხუთში 70 წლის ჭადრებს ჭრიან _ დეტალები, კომენტარები, კულუარები

პოლიტიკა
წყარო:  გურიის მოამბე / http://guriismoambe.com/ 
სტატიაში გამოქვეყნებულ მასალაზე პასუხისმგებელია ავტორი გამოცემა
ინფორმაციის გავრცელებას უზრუნველყოფს სააგენტო REGIONS.GE
 18 ივნისი 2020

ლანჩხუთის მთავარი მაგისტრალის გასწვრივ ჭადრის ხეებს ჭრიან. ამის შესახებ პირველი ინფორმაცია ფოტო-ვიდეო მასალასთან ერთად „გურია თუდეიმ“ ფეისბუქ-გვერდზე კვირას გაავრცელა.

მოლოდინისამებრ, ამას სოციალური ქსელის მომხმარებლებისგან დიდი გამოხმაურება და პროტესტი მოჰყვა, თუმცა უმალვე გამოუჩნდნენ ადგილობრივ ხელისუფლებას „დამცველები“ (რა თქმა უნდა, იმათ არ ვგულისხმობთ, ვისაც ამის გაკეთება სამსახურებრივად ევალებათ), რომელთა განცხადებები სინამდვილეში მერია-საკრებულოს დათვურ სამსახურს უწევს და უხერხულობაშიც აყენებს. ისე გააფთრებით იცავენ, დაგაეჭვებს, რომ რაღაც ვერ არის რიგზე.

ამას ამბობს რომან ბიწაძეც: „ეს იმის ბრალია, რომ არსებული პროექტის შესახებ მოსახლეობა ინფორმირებული არ იყო, აქედან გამომდინარე იქმნება შთაბეჭდილება, რომ ხელისუფლებას რაღაცის ეშინია და მოქმედებს ფარულად...“

რა თქმა უნდა, აქ იმ კონკრეტული ქუჩის მოსახლეობას არ გულისხმობს, რომლის განცხადების საფუძველზეც დაწყებულა ხეების მოჭრა...

ლანჩხუთში „ოცნებამ“ ძალიან ცუდი პრაქტიკა დაამკვიდრა _ თუ „ნაციონალები“ შუქსა და გზებს გვაყვედრიდნენ და შევარდნაძეს „ეტოლებოდნენ“, დღეს რამე თუ არ მოგეწონება, უმალ წამოვა „შეტევა“ და ყველა ნაცი „ხდება“ _ მაგათ დროს რომ ხდებოდა (ჭადროს მოჭრაც), მაშინ სად იყავითო.

რა კარგი არგუმენტია, არა? მარტივია ხელისუფლებაში ყოფნა, როცა ყველაფრის ნაცებზე დაბრალება შეგიძლია. არადა, „ნაცები“ ხომ პოლიტიკურ მოუსავლეთში გაუშვა მოსახლეობამ და 8 წელია „ვოცნებობთ“? ან როგორ უნდა გაამართლო დღევანდელი ხის მოჭრა „ნაცების“ დროს მოჭრილის წამოძახებით? რა გამოდის, რომ იმ დროს ეს დანაშაული იყო, ახლა კი „საქვეყნო საქმეა“?

პირდაპირ არ ამბობენ, მაგრამ მედიასაც გადმოწვდნენ _ მაშინ სად იყავითო? „გურია თუდეი“ მაშინ არ გამოდიოდა, მაგრამ ჩვენი ჟურნალისტები ჯერ კიდევ მაშინ აპროტესტებდენ ხეების ჭრას, როცა თქვენ ჯერ კიდევ „ნაციონალებს“ და უფრო ადრე შევარდნაძის ხელისუფლებაში ყოფნისას „ვერ ხედავდით“, როგორც დღეს „ვერ ხედავთ“.

ან რა უბედურებაა, ვინმე პროტესტს გამოთქვამს და უმალ _ „მაშინ სად იყავითო“? იქნებ ცდებოდა ადამიანი ან ეშინოდა ვინმეს და ამის გამო დღესაც შეცდეს და შეშინდეს? ამ შიშის გამო ხომ დავითხოვეთ ის ხელისუფლება?

თუმცა სინამდვილეში პროტესტს ის ხალხი გამოთქვამს, რომელთა უმეტესობამ ბევრი იბრძოლა, რომ თქვენ ხელისუფლებაში მოსულიყავით და ასე უხდით მადლობას?

დაამთავრეთ ეს „მაშინ სად იყავით“ და საქმეს მიხედოთ ჯობია. ორმაგი სტანდრატიც დამღუპველია, თუ „მაშინ სად ვიყავით“, ანუ დანაშაულზე დაგვიხუჭავს თვალი და რა გამოდის, ახლა თქვენ ჩადიხართ დანაშაულს?

აგერ, სამი თვის წინ „ქართული ოცნების“ ხელისუფლების მაღალჩინოსანი იყო ლადო ჩხაიძე, რომელიც იმ ქუჩისგან „ძან შორსაც“ არ ცხოვრობს და მოურიდებლად ამბობს: „ფული კეთდება, ბაბაია, პირველ რიგში და მერე „საქმე“... ვინ ეკითხება ხალხს. აქ დამცველები მეტი ჩანს... ტაშის დამკვრელები“.

ამას ამბობს ადამიანი, რომელიც ცოტა ხნის წინ ლანჩხუთის ჯანგანს თავკაცობდა და დაფიქრდით მაინც, რამხელა უხერხულობაში აყენებთ ადგილობრივ ხელისუფლებას, როცა ასეთ ეჭვებს თქვენს თანაგუნდელსაც კი გაუჩენთ.

არადა, საქმე შედარებით მარტივადაა და მერია-საკრებულოს დიდი ალბათობით, ოდენ მოსახლეობის გულისტკივილი აწუხებს. იმ მოსახლეობის, რომელიც მართლაც გაწამებულია ჭადრის ფოთლების სიუხვით:

„პირველ რიგში, ეს არის ამ ქუჩაზე მცხოვრები მოსახლეობის სურვილი და არაერთი ერთობლივი განცხადებაა შესული მუნიციპალიტეტში ამ საკითხის თაობაზე, როგორც იქნა, გადაწყდა და ამისათვის ნუ გვათრევთ ხალხო კაბელებით... (ხის ჭრისას კაბელი გაწყდა შემთხვევით და ვიღაცას დაუკომენტარებია, მაგ კაბელებით უნდა ათრიოო _ რედ.). კაბელი გაკეთდა, აქ ვინც არ ცხოვრობს, ვერ მიხვდება, რა ზიანი მოაქვს ჭადარს, აქვს, რა თქმა უნდა პლუსები, წყალს აორთქლებს და ჩრდილი აქვს, მაგრამ სამი თვე აქვს ფოთოლცვენა და მინდა ვიკითხო, როგორია სამი თვე ყველა მეორე დღეს ქუჩისა და ეზოების დასუფთავება, სანაგვე ბუნკერში ვერ ჩაყრი და არც უნდა ჩაყარო, მიწაში მთელი წელიწადი არ ლპება, უნდა დავწვათ ფოთოლი? გინახავთ მათი რაოდენობა? მოძრაობა იკეტება და ხალხი კვამლში იგუდება მთელი სამი თვე და ვიცით ამ ქუჩის მოსახლეობამ, რა დღეშიც ვართ, მოდით ჩვენი ქუჩა ჩვენ დაგვითმეთ. ახლა რაც შეეხება ინფრასტრუქტურულ მხარეს, ხალხნო კეთდება ძალიან ლამაზი გაზონები და ტროტუარები, გვინდა გავაშენოთ გაცილებით ძვირფასი და ლამაზი ნარგავები, რომლებიც არ დააზიანებენ არც ღობეს, არც ჭიშკარს, არც სანიაღვრეს და არც გაზონს, ამ ყველაფერს ჭადარი აფუჭებს, თუ არ გჯერათ, მობრძანდით და გაჩვენებთ, დაბოლოს მერწმუნეთ ძალიან ლამაზი ქუჩა იქნება“ _ თავისი ქუჩის პრობლემების შესახებ წერს  ლანჩხუთის საკრებულოს წევრი კახა ბოლქვაძე და ფაქტია, ყველა ეს პრობლემა ჟორდანიას ქუჩაზე რეალურად არსებობს.

თუმცა დანარჩენი მოსახლეობის დიდი ნაწილი ფიქრობს, რომ ამ პრობლემების მოსაგვარებლად ხელისუფლებას მოკვლევა უნდა ჩაეტარებინა. მათი თქმით, სანიაღვრე არხის დაზიანება და ხშირი ფოთლები, ორივე მოგვარებადია და ლამის ასწლოვანი ხეების მოჭრის არათუ კანონიერ, მორალურ უფლებასაც არ იძლევა. რაც შეეხება იმ ფაქტს, რომ ჭადრის ხე ალერგიულია, უნდა გამოიკვლიონ ჯანმრთელობაზე რა საფრთხეს წარმოადგენს, თორემ ყოველთვის იქნება კითხვა _ ეს ხალხი ალერგიული ახლა გახდაო?

მით უმეტეს, ჭადარი ის იშვიათი მცენარეა, 24 საათი ჟანგბადს რომ გამოყოფს და გარდა იმისა, რომ ტროტუარზე მოსიარულეს მზისგან იცავს, მთავარი მაგისტრალის გამო დაბინძურებული ჰაერის გასაწმენად მისწრებაა იმავე ქუჩაზე მცხოვრებთათვის განსაკუთრებით.

„ვინმეს მაგ ქუჩის, ან სხვა ქუჩის მცხოვრებს ღამე ხმაური ხომ არ აწუხებს და მოძრაობა აკრძალეთო, ხომ არ მოუწერია მერისთვის? სეჭვოა 100 მეტრს იზრდება და კილომეტრებზე ყრის ფოთლებს. გაკაფონ სამხრეთი ამერიკა? ხემ თავის საბოლოო ასაკს რომ მიაღწიოს, რა დრო სჭირდება? 1, 2, 3 თუ 20 წელი? სახარა გვინდა 20 წელი მაქ? და კიდევ, ხის, კაცის ხელით დარგულის და გახარებულის სიცოცხლის მოსპობას რომ ფოთლების მოხვეტა მეზარება და ამიტომ, თუნდაც ის გაუმართლებლობა აქვს, რომ სხვა ხის ფოთლების მოხვეტა მოუწევს, ახლა რომ გაუდაბნოებით ბედნიერია, იმას. ცხადია 20 წლის შემდეგ. მოუწევს თუ ზაფხულში დარგული ნერგი გაიხარებს და 20 წელს დაელოდება“ _ ეს ლანჩხუთის საკრებულოს წევრის ამირან გიგინეიშვილის კომენტარია.

„მაშინ სად ვიყავით“ პერიოდში ლანჩხუთში მოჭრილ ხეებს დღესაც მისტირის მოსახლეობა: `ნინოშვილის ქუჩაზე რომ მოიჭრა ჭადრები, ამას დღესაც ნანობს ის ხალხი. მოჭრიან და სიგრილე სანატრელი გაუხდებათ. ნეტავ მეტი არაფერი აქვს პრობლემა იმ ხალხს? მარტო ჭადრებია მათი პრობლემა? მიდით, დაამსგავსეთ უდაბნოს ის ქუჩა“ _ წუხს გოჩა ჩახვაშვილი.

„თუ იცით, დაწერეთ კონკრეტულად, ვისი სახლია დაზიანებული ჭადრების ფესვებისგან. იმან თქვა, ამან თქვა არ გამოვა. მით უმეტეს, გვიმბალაურის მიმართულებით თუ გადაავადგილდებით, გზის ხელმარცხნივ მდებარე ჭადრები სახლებისაგან ძალიან შორსაა დაშორებული. ერთი ფაქტი ვიცი ქალაქის ტერიტორიაზე, კოსტავას ქუჩაზე ფისო მეიშვილის სახლია დაზიანებული ცაცხვით, ყველა ინსტანციიდან თანხმობა გაცემულია მის მოჭრაზე დიდი ხანია, მაგრამ ეს ხე მაინც მოუჭრელია“ _ ამბობს რომან ბიწაძე.

ლანჩხუთის მერი სოსო ბოლქვაძეც ჟორდანიას ქუჩის მაცხოვრებელია და მისი გულისტკივილიც გასაგებია: „ძველი რაიკომის წინ რომ მართლაც ასწლიანი ნაძვები მოჭრეს, ის თუ მოიკვლიეთ? არ ვიტყოდი არაფერს, მაგრამ რაღაც ძალიან ააგორეს ეგ ჭადრების თემა. დიახ, მომხრე ვარ, თუ ახალი ტროტუარები კეთდება, დაირგას დეკორატიული ნარგავები, თუნდაც ნეკერჩხალი, ვერ გავიგე მე ვცხოვრობ იქ და სხვა ქუჩის მაცხოვრებელი მიგეგმავს ჩემ სახლის წინ რა უფრო მისაღებია? რა უბედურებაა! იმაზე თუ დაფიქრებულა ვინმე, თუ როგორ ჩრდილავს ეზოს ტერიტორიას? ჩრდილის ქვეშ კი დაბალი ჯიშის ხეხილი ვერ ხარობს, რომ არაფერი ვთქვათ ყურძენზე და ბოსტნეულზე. აი, მაგალითად ჭალადიდში მაგისტრალს მიყვება და ძალიან ლამაზი ხეივანია, ისეთი ხეები უნდა დაირგას, რომ მოსახლეობა არ შეწუხდეს...“

მას ამირან გიგინეიშვილი პასუხობს: „ჩემ ეზოს წინ კეთდება და მე უნდა მკითხონ და არა სხვა ქუჩის მაცხოვრებელს“ - ამას მწვანე საფარზე წერ? გამოდის, ვაკის პარკი თუ ააოხრეს, მარტო ვაკელებს უნდა ჰკითხონ და ლანჩხუთის ცენტრალური პარკის გადახვნა თუ მოინდომეს, მარტო ევიკო ჩიჩუას, რადგან იქვე ცხოვრობს? პოლონეთის ქალაქი დრუსკინინკაი მთლიანად ტყეშია. დაგუგლეთ და ნახეთ. ჰოდა, იქაური მოსახლეობის ნაწილს რომ მოეთხოვა, ფოთოლცვენის გამო ტყის გაჩეხვა, კარგი იქნებოდა? აქ ტყე არაა და რაცაა, იმას ვჩეხავთ!“

„საერთოდ, „მოსახლეობის მოთხოვნით“ ხე არ იჭრება. არსებობს ასეთი დოკუმენტი `ხეების მოვლა საქართველოს ქალაქებში“, რომელიც გერმანული ფონდის მიერ არის მომზადებული ევროკავშირის გამოცდილების მიხედვით. რეკომენდირებულია, რომ მუნიციპალიტეტებმა ამ წესით იხელმძღვანელონ ხეების მოვლის დროს. რაც შეეხება ჭადარს, ესაა ევროპაში ურბანულ გამწვანებაში N1 ხე, წინ დგას ყველა ფოთლოვანზე და მით უმეტეს წიწვოვანზე და საქართველოში გავრცელებული აზრის საწინააღმდეგოდ, არ არის ალერგიული. ზედასეული ფოთლოვანი ხე წყლის დიდ რაოდენობას იწოვს და სანიაღვრე არხების დატვირთვას ამცირებს“ _ ამას გრიგოლ მახარაძე წერს და იქვე შესაბამის, ლინკსაც აზიარებს.

ლანჩხუთელი ახალგაზრდა პოეტი, პაპუნა ფირცხალაიშვილი, რომელსაც „ოცნების“ მხარდასაჭერად ბევრი გაუკეთებია, წერს: „ადგილზე გავეცანი სიტუაციას ლანჩხუთის მერთან ალექსანდრე სარიშვილთან ერთად. ამ ჭადრების მოჭრა არის ადგილობრივების სურვილი, მთავარი არგუმენტია, რომ ჭადარს აქვს ბევრი ფოთოლი და დაახლოებით სამი თვის განმავლობაში ეტაპობრივად ცვივა და ივსება ეზოები ამ ფოთლებით, კიდევ იყო სხვა არგუმენტები, რომ სანიაღვრე არხებს აფუჭებს და ა.შ. მაგრამ რეალურად დაზიანებული არ ყოფილა არხი, მხოლოდ რამდენიმე ბზარი ეტყობოდა. ადგილზე იგეგმება ტროტუარის მოწყობა მცირე გამწვანებული ზოლით და ახალი ხეების გაშენება, რომელიც ჯერ არ არის მოფიქრებული. ყველაზე ცუდი ის არის, რომ ამ საქმეში ერთი სპეციალისტი და ამ საქმის პროფესიონალიც კი არ ფიგურირებს: არც ბოტანიკოსი, არც მიწის ექსპერტი და არც არავინ. ჯერჯერობით მოჭრილია სამი ჭადარი...“ _ პოსტთან ერთად ის კითხვას სვამს, მოიჭრას უნდა თუ არა ჭადრები.

გუშინ საღამოს მდგომარეობით, 196 ადამიანი (74,2%) ხეების მოჭრის კატეგორიული წინააღმდეგია; 37 (14,1%) თვლის, რომ უნდა მოიჭრას, თუ ადგილობრივების სურვილია; 22-ის (8,3%) აზრით, უნდა გადაიმოროს; 5 (1,8%) თვლის, რომ ბინის წინ მაინც უნდა დატოვონ; მხოლოდ 4-ის (1,5%) მოსაზრებაა, რომ აუცილებლად უნდა მოიჭრას. ამის მიუხედავად, გუშინ მთელი დღე გრძელდებოდა ჭადრების მოჭრა...

კიდევ ერთმა ლანჩხუთელმა ახალგაზრდამ, დათო ხუხუნაიშვილმა კი „ფეისბუქზე“ პეტიცია წამოიწყო, რომ შეჩერდეს ჭადრის ხეების მოჭრა...

წყარო: "გურია თუდეი"

დასაკომენტარებლად გთხოვთ გაიაროთ ავტორიზაცია/რეგისტრაცია