გურია

შენახვა


გადაგზავნა

დაკომენტარება

მიშას ვერ ვუთხარი უარი! – ნანუკა ჟორჟოლიანის პირველი მიმართვა ამომრჩევლებს ახალ ამპლუაში

პოლიტიკა
წყარო:  გურიის მოამბე / http://guriismoambe.com/ 
სტატიაში გამოქვეყნებულ მასალაზე პასუხისმგებელია ავტორი გამოცემა
ინფორმაციის გავრცელებას უზრუნველყოფს სააგენტო REGIONS.GE
 23 სექტემბერი 2020

„ერთიანი ნაციონალური მოძრაობის“ და გაერთიანება „ძალა ერთობაშია“-ს იმერეთის რეგიონის ერთ-ერთ ოლქში მაჟორიტარ დეპუტატად წარდგენილი ნანუკა ჟორჟოლიანი თავის გადაცემის ეთერს პოლიტიკაში წასვლის შესახებ მონოლოგით იწყებს.

როგორც ის ამბობს, ეს შეთავაზება უშუალოდ მიხეილ სააკაშვილისგან მიიღო და თანამებრძოლ მეგობარს უარი არ უთხრა. ნანუკა ჟორჟოლიანი ამომრჩეველს ჰპირდება, რომ არასოდეს მოატყუებს, ყოველთვის მოუსმენს და მისი საარჩევნო კამპანია სხვა პოლიტიკოსებისგან განსხვავებული იქნება.

ის ოპონენტებს მშვიდობიან წინასაარჩევნო აქტივობებს ჰპირდება და აცხადებს, რომ ის დაპირისპირებაში შესვლას არ აპირებს. სკეპტიკოსებს კი სთხოვს, რომ უბრალოდ დრო მისცენ მანამ, სანამ არ ნახავენ მის საქმიანობას და ნუ გააკრიტიკებენ.

ტელეწამყვანმა მაყურებელს მხარდაჭერა სთხოვა…

„დღეს, ჩემს ცხოვრებაში ყველაზე უცნაური ოთხშაბათია. წესით, ჩემს ცხოვრებაში მიღებული ერთ-ერთი მთავარი გადაწყვეტილება უნდა შეგატყობინოთ, მაგრამ ისიც კი არ ვიცი, როგორ უნდა გითხრათ, რადგან, 2 საათის წინ, მივიღე გადაწყვეტილება, მეთქვა თანხმობა, ვიყარო კენჭი თქვენი ნდობის მოპოვებაზე, თქვენი გულის მოგებაზე.

გეტყვით იმას, რომ ეს შემოთავაზება არაერთხელ მიმიღია, მაგრამ უარს ვამბობდი,რადგან არ მინდა ქართული პოლიტიკის ნაწილი ვიყო. დიდად აღფრთოვანებული არ ვიყავი, რასაც ტელეეკრანებზე ვხედავ, ვიღაცები მომწონს, ვიღაცები არ მომწონს, მთლიანობაში არ მინდოდა ამ დიდი რაღაცის მონაწილე ვყოფილიყავი.

კარგად დამარწმუნეს, რომ ეს ომია და არასოდეს ომში წასვლაზე უარი არ მითქვამს. ვფიქრობ, რომ 2003 წელსაც ომი იყო, ბრძოლის ხაზი ყოველთვის იყო, ახლაც ბრძოლის ხაზი ამ არჩევნებზე გადის. თუ შემიძლია, ამ ბრძოლაში ოპოზიციას და იმ ძალას, რომელმაც მე წარმადგინა ერთი აგური მაინც დავუდო, ვიფიქრე, რომ ეს კარგი შანსი იქნებოდა ამისთვის.

არ ვიცი, როგორ გელაპარაკოთ პოლიტიკური ვერბალით (ტერმინოლოგიით), არ ვაპირებ, რომ ეს ვისწავლო. არ ვაპირებ, რომ თავი ციფრებზე ლაპარაკით მოგაბეზროთ,არ ვაპირებ გავხდე პოლიტიკოსი.

ვაპირებ, ყველა სოფელში ჩამოვიდე, გადავთვალე და დღეში 7-8 სოფლის მოვლა მომიწევს, ეს მარტივია ჩემთვის – ჩამოვალ და ჩემს სათქმელს გეტყვით, ჩამოვალ იმ ადამიანებთან, რომლებსაც ვუყვარვარ და არ ვუყვარვარ, თქვენ მოგისმენთ.

ერთადერთ რამეს დაგპირდებით – ყოველთვის მოვისმენ თქვენი პრობლემების შესახებ, ყოველთვის ყველაფერს გავაკეთებ მათ შესაცვლელად. არასოდეს ჩემთვის სტატისტიკა არ იქნებით, არასოდეს კვადრატული მეტრობით არ დაგთვლით, ჩემთვის ციფრები არასოდეს არ გახდებით. თქვენ ხართ ადამიანები თქვენი სახელებით, ამბებითა და ისტორიებით, რომლებსაც გულწრფელ პირობას გაძლევთ, რომ გულთან მივიტან.

ზუსტად ვიცი, რასაც ვიზამ – არასოდეს ტყუილს არ გეტყვით, არასოდეს არ დაგპირდებით იმას, რასაც ვერ შევასრულებ. ვიქნები გულწრფელი. ალბათ, შეცდომებსაც დავუშვებ და ოპონენტები ამით ისარგებლებენ. ალბათ, წამოვა კრიტიკის ქარცეცხლი, ალბათ თავს დამესხმევიან, ალბათ, გამიხსენებენ ყველაფერს, იმასაც კი, რაც ბავშვობაში წყალტუბოში დამიშავებია, მაგრამ ეს ჩემთვის პრობლემა არ არის, რადგან ჩემმა ცხოვრებამ სხვანაირი ხალისი შეიძინა.

მე ამ გამოწვევის არ მეშინია. მთელი შემართებით ყველაფერს გავაკეთებ იმისთვის, რომ ახალი ტიპი შევქმნა, ისეთი, როგორიც მე მინდა რომ იყვნენ პოლიტიკოსები. არ ვაპირებ არავის ლანძღვას, თითის ქნევას, ეს არ იქნება ჩემი კამპანია. საჯაროდ ვუდასტურებ პატივისცემას ჩემს მთავარ კონკურენტს გივი ჭიჭინაძეს, არავითარ შემთხვევაში არ შევალ მასთან ბინძურ კამპანიასა და ბრძოლაში.

ჩამოვალ თქვენთან პერსონალურად და ვიცხოვრებ თქვენი ცხოვრებისთვის და ყველაფერს ვიზამ იმისთვის, რომ თქვენი ახლობელი და თქვენი შინაური გავხდე.

შესაძლოა, პოლიტიკურად ეს არასწორი სპიჩი იყო, მაგრამ ეს არის სინამდვილეში ის, რატომაც გადავწყვიტე, ჩემს მეგობარს, ვისი თანამებრძოლიც ვიყავი ამ დრომდე და ვთვლი მთავარ წარმატების ფორმულად, რაც ამ ქვეყნის პირველ პირებში შექმნილა, მიშას ვერ ვუთხარი უარი ამ მთავარ გამოწვევაზე.

ყოველ ოთხშაბათს საღამოს, მე აქ, სტუდიაში თქვენი პრობლემებისთვის ვიქნები და არ ვიქნები ერთ ლოკაციაზე, ყველას შეგეძლებათ მოგვმართოთ.

კარგი ეტაპი იწყება ჩემს ცხოვრებაში… ალბათ ვიღაცებს გაგიხარდათ, ვიღაცებს არ გაგეხარდათ, მაგრამ მე მინდა შევქმნა ლოკალურ სივრცეში რაღაც ახალი, რომელიც აქამდე არ გინახავთ.

ჩემი მთავარი კოზირი იქნება ის, რომ ტყუილს არ გეტყვით. თითოეული მაყურებლის მხარდაჭერა მჭირდება, ძალიან გთხოვთ, სანამ არ ნახავთ როგორი კამპანია მექნება, სანამ არ ნახავთ ბრძოლაში როგორ შევალ, მანამდე არ გამკიცხოთ და არ გამაკრიტიკოთ. ჯერ მომეცით დრო იმისა, რომ განახოთ რისი გაკეთება მინდა…“ – ამბობს ნანუკა ჟორჟოლიანი.  

შეგახსენებთ, „ერთიანმა ნაციონალურმა მოძრაობამ” და გაერთიანებულმა ოპოზიციამ „ძალა ერთობაშია” მაჟორიტარი დეპუტატობის კანდიდატები წარადგინა, მათ შორის სამტრედია, წყალტუბო, ვანისა და ხონის ოლქში – ნანუკა ჟორჟოლიანი.

 

 

დასაკომენტარებლად გთხოვთ გაიაროთ ავტორიზაცია/რეგისტრაცია