კახეთი
უკრაინის მხარდაჭერა ევროკავშირის მოქალაქეების მიერ ისევ დადებითად აღიქმება
ევრობარომეტრის (Eurobarometer) ახალი კვლევა, რომელიც დღეს გამოქვეყნდა, აჩვენებს, რომ ევროკავშირის მოქალაქეების უმრავლესობა დადებითად არის განწყობილი ევროკავშირის ბოლო ქმედებების მიმართ ენერგეტიკული კრიზისის დაძლევასთან დაკავშირებით.
კერძოდ, ევროკავშირის ათი მოქალაქიდან 8-ზე მეტი (82%) ეთანხმება მოსაზრებას, რომ ევროკავშირმა უნდა გააგრძელოს ქმედებები რუსეთის წიაღისეულ საწვავზე დამოკიდებულების შესამცირებლად. გამოკითხულთა აბსოლუტური უმრავლესობა (83%) ფიქრობს, რომ რუსეთის ომი უკრაინის წინააღმდეგ განახლებად ენერგიაში ინვესტირებას უფრო აქტუალურს ხდის. მათი 87% მიიჩნევს, რომ გადამწყვეტი მნიშვნელობა აქვს ისეთი კრიტიკული ინფრასტრუქტურის დაცვას, როგორიცაა მილსადენები და ინტერნეტ კაბელები, ხოლო 83% ეთანხმება იმას, რომ ელექტროენერგიის ფასი გაზის ფასზე არ უნდა იყოს დამოკიდებული.
რესპონდენტები მასიურად ამბობენ (85%), რომ ენერგომატარებლებზე ფასების ზრდამ მათ მსყიდველუნარიანობაზე გავლენა იქონია. 56% ეთანხმება, რომ ბოლო დროს ფასების ზრდა ძირითადად რუსეთის აგრესიული ქცევით არის განპირობებული, ხოლო 38% არ ეთანხმება.
გამოკითხულთა 49% ფიქრობს, რომ ევროკავშირის მიერ ეკონომიკური მდგომარეობის გასაუმჯობესებლად გატარებული ღონისძიებები დადებით გავლენას მოახდენს, 18% – უარყოფით გავლენას და 22% – არანაირ გავლენას არ მოახდენს.
თავად რესპონდენტებმა უკვე მიიღეს ზომები, ენერგიის მოხმარებისა და შესაბამისი გადასახადების შესამცირებლად, ან ამისთვის მზად არიან, კერძოდ, იგულისხმება შუქის გამორთვა ოთახის დროებით დატოვებისას (77%,[1]), ელექტრონული მოწყობილობების გამორთვა, როდესაც ისინი არ გამოიყენება (62%) და ოთახის ტემპერატურის შემცირება (58%).
უკრაინის წინააღმდეგ რუსეთის აგრესიულ ომზე საპასუხოდ ევროკავშირის მიერ მიღებული ზომები მოქალაქეების მხრიდან მყარი მხარდაჭერით კვლავ სარგებლობს. ევროპის მოქალაქეები მასობრივად ემხრობიან ჰუმანიტარული დახმარების გაწევას (88%), რასაც მოჰყვა ომს გარიდებული ადამიანების მიღება (82%). ათი რესპონდენტიდან შვიდი ემხრობა ეკონომიკურ სანქციებს რუსეთის მთავრობის, კომპანიებისა და ფიზიკური პირების წინააღმდეგ (71%), ისევე როგორც უკრაინის ფინანსურ მხარდაჭერას (70%). მოქალაქეთა უმრავლესობა ასევე ეთანხმება რუსული მედიის აკრძალვას (63%) და უკრაინისთვის სამხედრო ტექნიკის შესყიდვასა და მიწოდებას (59%).
ევრობარომეტრის (Eurobarometer) საგანგებო გამოშვება „ევროკავშირის რეაგირება ენერგეტიკულ კრიზისზე“ ჩატარდა 27 წევრ ქვეყანაში 2022 წლის 23-დან 30 ნოემბრამდე. ონლაინ გამოკითხულია 26 337 მოქალაქე.
